मुंबई : विधानसभा अध्यक्षपदी राहुल नार्वेकर यांच्या बिनविरोध निवडीनंतर उपमुख्यमंत्री एकनाथ शिंदे यांनी विरोधकांवर जोरदार टीका केली. “लोकांनी तुम्हाला नाकारले आहे, हे वास्तव स्वीकारा,” असे म्हणत त्यांनी विरोधकांना चिमटे काढले. काँग्रेसला ८० लाख मते मिळूनही फक्त १६ जागा मिळाल्या, याचा संदर्भ देत शिंदे म्हणाले, “लोकांच्या मनात काय चालले आहे, हे तुम्हाला कळले असते तर आज ही अवस्था झाली नसती. त्यामुळेच बाळासाहेब थोरात आज सभागृहात नाहीत आणि नाना पटोले २०८ मतांनी थोडक्यात वाचले.”
‘रडीचा डाव किती दिवस?’ – अजित पवार यांची टीका
उपमुख्यमंत्री अजित पवार यांनीही विरोधकांवर हल्लाबोल करत विधानसभेत भाषण केले. “लोकसभेला आम्ही कमी पडलो तेव्हा आम्ही रडत बसलो नाही. तुम्ही मात्र विधानसभेला हरलात आणि ईव्हीएमला दोष देत रडीचा डाव खेळत आहात,” असे पवार म्हणाले.
पक्षफुटीनंतर राहुल नार्वेकर यांच्यावर झालेल्या टीकेचा संदर्भ देत ते म्हणाले, “विरोधकांनी ताळतंत्र सोडून टीका केली; पण नार्वेकर संयमी राहिले आणि ऐतिहासिक निर्णय दिले.”
थोरात-पटोले यांचा पराभव हा लोकभावनेचा संकेत – शिंदे
सभागृहात बोलताना शिंदे म्हणाले, “बाळासाहेब थोरात यांचा पराभव आणि नाना पटोले यांचा थोडक्यात बचाव हा लोकभावनेचा स्पष्ट संकेत आहे. काँग्रेसच्या नेतृत्वाला लोकांनी नाकारले आहे. आता तरी विरोधकांनी वास्तव स्वीकारले पाहिजे आणि जनतेच्या मनातील भावना ओळखली पाहिजे.”
सभागृहात हशा आणि टोलेबाजी
“लाडक्या बहिणींनी आम्हाला इथे बसवले, हे लक्षात ठेवा,” अशा मिश्किल शैलीत पवारांनी विरोधकांना चिमटा काढला. तर शिंदे यांनी विरोधकांना उपहासाने म्हटले, “तुम्ही ईव्हीएमला दोष देत आहात, पण लोकांनी तुमचा करेक्ट कार्यक्रम केला आहे.”
सभागृहात सत्ताधारी व विरोधकांमध्ये टीका-प्रतिटीकांच्या फैरी झडत असताना शिंदे आणि पवार यांच्या भाषणांमुळे वातावरण तापले होते.
