बोधगया (बिहार), 7 मे 2025 –
तथागत बुद्धांना ज्ञानप्राप्ती झालेल्या पवित्र भूमीवर सुरू असलेल्या महाबोधी मुक्ती आंदोलन आता अधिक तीव्र होत चालले आहे. बौद्ध धर्मीयांना महाबोधी मंदिराच्या संपूर्ण व्यवस्थापनाचा हक्क मिळावा, या मागणीसाठी देशभरातून बौद्ध समाज एकवटत आहे. अशा निर्णायक वेळी राजकुमार बडोले फाउंडेशनचे संस्थापक अध्यक्ष, माजी मंत्री व विद्यमान आमदार इंजिनिअर राजकुमार बडोले स्वतः बोधगया येथे दाखल होऊन आंदोलनास सक्रिय पाठिंबा जाहीर केला.
बडोले यांचा स्पष्ट इशारा:
“या आंदोलनाचं यश हे केवळ शासनावर अवलंबून नाही, तर आपल्या एकजुटीवरही आहे. आपसात आरोप-प्रत्यारोप करून आपणच आपला लढा कमजोर करत आहोत. हा वेदनादायक सत्य आहे. म्हणूनच मी सर्व भिक्षु वर्ग, उपासक-उपासिका आणि बौद्ध समाजाला आवाहन करतो – एकत्र या, नाहीतर इतिहास माफ करणार नाही!”
बिहार सरकारकडे ठोस मागणी:
बडोले यांनी बिहार सरकारकडेही स्पष्ट शब्दांत मागणी केली की, “महाबोधी मंदिराला फक्त पर्यटनस्थळ किंवा औद्योगिक प्रकल्प समजून वागू नका. ही बौद्धांची आत्मा आहे. त्यावर फक्त आणि फक्त बौद्ध समाजाचा हक्क आहे.”
जत्था सहभागी:
या दौऱ्यात राजकुमार बडोले फाउंडेशनचे ४५ सदस्य आंदोलनात सहभागी झाले असून, ते महाराष्ट्रातून आंदोलनासाठी विशेषतः दाखल झाले आहेत. हे सर्व सदस्य आंदोलनस्थळी बौद्ध भिक्षूंना सहकार्य करत आहेत आणि विविध आयोजनांमध्ये सहभागी होत आहेत.
सांस्कृतिक आणि सामाजिक लढ्याला नवे रूप:
बडोले यांच्या उपस्थितीने आंदोलनात नवचैतन्य निर्माण झाले आहे. करुणा, शांती आणि समतेच्या तत्वांवर आधारित आंदोलन आता सामाजिक चेतनेचे रूप घेत आहे. आंदोलनात सहभागी अनेक कार्यकर्ते आणि बौद्ध भिक्षुंनी बडोले यांचे आभार मानले.
आंदोलन अधिक व्यापक होण्याची शक्यता:
या घटनाक्रमानंतर आंदोलन आता इतर राज्यांतही पोहोचण्याची शक्यता निर्माण झाली आहे. विशेषतः महाराष्ट्र, मध्यप्रदेश, आणि उत्तर भारतातील बौद्ध समाजात संताप आणि असंतोष वाढू लागला आहे. पुढील टप्प्यात महाबोधी मुक्ती आंदोलन देशव्यापी रूप घेऊ शकते.
