नवेगावबांध पर्यटन विकासासाठी ५० कोटींच्या निधीची मागणी – पर्यटनमंत्री शंभुराजे देसाई यांची सकारात्मक भूमिका

मुंबई/गोंदिया – नवेगावबांध पर्यटन क्षेत्राचा सर्वांगीण विकास करण्यासाठी ५० कोटींच्या विशेष निधीची मागणी आज पर्यटनमंत्री शंभुराजे देसाई यांच्याकडे करण्यात आली. या भेटीदरम्यान पर्यटन क्षेत्राच्या विस्तारासाठी आवश्यक पायाभूत सुविधांबाबत विस्तृत चर्चा झाली.

पर्यटनमंत्र्यांनी या मागणीबाबत सकारात्मक भूमिका घेतली असून, मार्चनंतर या निधीच्या मंजुरीसाठी प्रयत्न करण्यात येतील, असे आश्वासन त्यांनी दिले. यामुळे नवेगावबांध परिसरातील पर्यटन वाढीला चालना मिळेल, अशी अपेक्षा व्यक्त होत आहे.

पर्यटन वाढीसाठी आवश्यक पायाभूत सुविधा

नवेगावबांध हा विदर्भातील एक महत्त्वाचा पर्यटकस्थळ असून, येथे दरवर्षी मोठ्या प्रमाणावर पर्यटक भेट देतात. परिसरातील रस्ते, निवास व्यवस्था, स्वच्छता, पर्यटन सुविधांचा अभाव यामुळे संधी असूनही अपेक्षित प्रगती झाली नाही. त्यामुळे या ५० कोटी निधीतून पर्यटनस्थळाचा सर्वांगीण विकास करण्याचा मानस आहे.

प्रस्तावित विकास आराखड्यात रस्त्यांचे नुतनीकरण, पर्यटकांसाठी विश्रांतीगृहे, बोटिंग सुविधा, वाइल्डलाइफ सफारीचा विस्तार, माहिती केंद्र, स्वच्छता व सुविधांच्या उभारणीसाठी तरतूद असेल. यामुळे स्थानिक रोजगार वाढण्यास मदत होईल, तसेच विदर्भातील पर्यटन नकाशावर नवेगावबांध अधिक ठळकपणे अधोरेखित होईल.

स्थनिक जनतेच्या आणि पर्यावरणाच्या हिताचा निर्णय

नवेगावबांध राष्ट्रीय उद्यान परिसर जैवविविधतेसाठी ओळखला जातो. त्यामुळे पर्यावरणपूरक पर्यटन विकासाला प्राधान्य दिले जाणार आहे. स्थानिक आदिवासी आणि ग्रामस्थांच्या सहकार्याने पर्यटन वाढीचे प्रयत्न करण्यात येतील, असेही सांगण्यात आले.

पर्यटनमंत्र्यांच्या या सकारात्मक भूमिकेमुळे नवेगावबांध पर्यटन क्षेत्राच्या विकासाला नवे दालन खुले होण्याची शक्यता आहे. मार्चनंतर निधी मंजूर झाल्यास, लवकरच विकासकामांना गती मिळेल, अशी अपेक्षा व्यक्त होत आहे.